Unsere Leserseite

Aosre Volksvertreder

Se hend a Wohnung an der Schbree – ond pendled oft durch d’ Republik, dr Hoimet zua em ICE – am näggschda Dag em Schädd z’rick. Bei’r Hatz vo Tagung zor Konf’renz – dô blôst ma äll Art Dreibschdoff naus, se machet sich an scheena Lenz – ond meischdens kommt nix dabei raus! Luxus muaß sei ond nix isch z’deier – Komfort vom Tiikholz bis zom Leder. Koschd’s was will – des zahlt jô d’ Schdeier – den Schblien vo onsre Volksvertreder.

Ob en Berlin oder en Brissel – de meischde hend an Schbrong en der Schissel!

Et blos dia Banga, noi de ganz Welt – wellet dia redda mit onserm Geld,

ond s’ Schbarbüachle vom Opa – gôhd drauf jetzt fir Europa!

Digge, Denne, Broide, Schmale – Sozialischda, Liberale, Kommunischda, Demokrada – Lährer, Ärzd ond Advokada, oine heller, andre doofer – mit Boss-Azügla ond Pullover.

Gälbe, Schwaarze, Greane, Roode – Hochvitale ond Scheindode.

Viel send pudret oder g’schmenget, andre mô nôch Käsfiaß schdenget.

Alde Daggel, Schdeile Zäh – halded sich fir d’ Hoddvollee.

Se schdrigget, schdreided, oiner pennt– zom Wohl des Volks em Parlament.

Geschäftig husched se durch d’ Gäng – in Wahrnehmong der Volksenträssa.

An manche Däg send’s drei Empfäng – nô send se völlig iiberfressa.

Ond selbverschdändlich – kasch dr denga – kommd ma ao dromm so ogern z’schbäd,

weil z’erschd gibt’s teura Sekt zom drenga – ansonschda hend se blos Diäd . . . !

Am Schlemmschda isch – sell isch fatal – ond nô hodds Volk gar nix maih z’ lachet,

gôhds en Klausur mit Schdreid en Saal – drei Dag bevor se Urlaub machet.

Nô sieschd dia Menscha oimol schaffa – des grenzd gar a-n-a Sensazio,

se machet Burzelbeem wia d’ Affa – ma brauchd Konsens – d’ Zeit laofd davo!

Jetzt rauchet d’ Köpf ond dampfet d’ Sogga – ond oiner zullet ama Schdomba,

d’ Oppositio bleibt länger hogga – ao d` Koalitio lôhd sich ed lomba.

Se wend sich ed oinig, a schwearer Fall – auf zmol lupfts em Bräsidenda sei Zong:

„Auf gôhds, ihr Rendviecher, naus aus em Schdall – ond als Schôf wieder rei zom Hammelschbrong!“

Ond jetzt wird entschieda, ma kennt koi Erbarma – em Endrässe dr Wirtschaft miassed se schdreicha,

zo Laschda vom Schdemmvieh, de Schwache ond Arma – bezuaschusst ma liaber Konsum bei ma Reicha.

Als deren Anwälde, Knechd ond Lakaia – miassed se ao ihre Endrässa verdräda,

ond dromm – ond des wurd se ganz bsonders fraia – genehmigt ma gschwend sich no höh’re Diäda.

Hend somit a gsonde Pensio sich verschafft – s’gibt ao a Läaba no nôch em Mandat.

Als Dank für dia’Eisätz ond d’ Schaffenskraft – schbendiert ma’n a Pöschdle als Aufsichtsrat.

Et onder zwoi Milliona – s’ sott se jô ao lohna!